Республикамыздың өңірлерінде іріктеу кезеңін «Айтыс ақындары мен жыршы-термешілердің халықаралық одағы» Республикалық қоғамдық бірлестігі өзінің өңірлердегі филиалдары арқылы жүзеге асырады.
Іріктеу кезеңінің қорытындысы бойынша І кезеңге 20 жас ақын қатысады (әр өңірден бір қатысушыдан). Қандай да бір өңірден қатысушы болмаған жағдайда, Ұйымдастырушы қатысушының квотасын басқа өңірлердің пайдасына қайта бөлуге құқылы.

• Іріктеу кезеңі – өңірлерде 1 - 17 қазан аралығы
• I кезең – Астана қаласында 31 қазан
• II кезең және финалдық кезең – Астана қаласында 1 қараша

Іс-шара аясында Астана қаласына бару және кері жол жүру, тамақтану, тұратын жер, Астана қаласы бойынша көлікпен жүру шығындарын Айтысқа қатысушылар өздері көтереді.

Қатысушылар сөз сайыстыру (айтысу) барысында өзіне берілген уақытты тиімді пайдаланып, айтар ойын ұтымды әрі жүйелі жеткізулеріне баса назар аударады. Айтыста елдің бірлігіне, ұлтаралық татулыққа нұқсан келтіретін, конституциялық құрылысқа қарсы айтылатын сөздерге жол берілмейді.

Айтыс жеңімпаздарына:
•⁠ ⁠Гран-при иегеріне диплом, «Қола» домбыра және ақшалай сыйақы;
•⁠ ⁠I, II, III орын иелеріне дипломдар және ақшалай сыйақы беріледі.
Сондай-ақ бірқатар қатысушыларға «El Umiti» арнайы сыйлықтары қарастырылған.